Adran y Wasg

Dyma ychydig yn unig o'r digwyddiadau cyffrous sy'n cael eu cynnal ar stondin 'Llenyddiaeth yng Nghymru' eleni yng Ngŵyl Guardian y Gelli, 21-31 Mai 2009.

Ddydd Mercher, 27 Mai, bydd y cyn-chwaraewr rygbi enwog Scott Quinnell yn siarad am yr hyn a'i ysbrydolodd i sgrifennu'i lyfr darllen sydyn The Hardest Test (Accent Press, 2008). Bydd cyfle hefyd i gwrdd â'r storïwr o fri rhynglwadol ac enillydd gwobr Tir na n-Og, Daniel Morden, a fydd yn cynrychioli Cymru yn y Smithsonian Folklife Festival yn Washington yn ddiweddarach eleni.

Bydd enillwyr dyfarniadau llên Cymru Greadigol Cyngor Celfyddydau Cymru 2009, Owen Martell a Jon Gower, yn cyflwyno'u prosiectau diweddaraf. Yma hefyd y bydd enillydd Cymru Greadigol 2007, y nofelydd, James Hawes, yn trafod Why You Should Read Kafka Before You Waste Your Life (St Martin's Press, 2008).

Bydd llenorion newydd yn ymddangos ar y stondin hefyd. Bydd Meirion Jordan yn trafod ei flodeugerdd ryfeddol gyntaf o farddoniaeth, Moonrise, (Seren 2008) a bydd Louise Walsh yn siarad am ei nofel sydd wedi'i gosod ym myd paffio i ferched, Fighting Pretty (Seren 2008). Bydd gwasg Honno yn cyflwyno Caroline Ross a gyhoeddodd ei nofel gyntaf The War Before Mine yn 2008. Bydd Lorraine Jenkin, sydd wedi ysgrifennu i'r Guardian a'r Times, yn ymuno â hi. Yn dilyn ei blog enwog Chocolate Mousse and Two Spoons (Honno, 2008), bydd Lorraine yn cyhoeddi Eating Blackbirds cyn hir.

Bydd yr awdur Michael O'Brien yn arwyddo copïau o The Death of Justice (Y Lolfa, 2008), cofnod di-flewyn ar dafod o'r un mlynedd ar ddeg a dreuliodd yn y carchar am drosedd na wnaeth ei chyflawni.

Bydd yr awdur a'r llenor arobryn, Mererid Hopwood, yn siarad am weithdy Celfyddydau Rhyngwladol Cymru/y Cyngor Prydeinig yn Jaipur, India a'r gweithdy ysgolion a gynhaliodd wedi hynny yn India a Chymru. Bydd Bardd Cenedlaethol Cymru, Gillian Clarke, ac enillydd dyfarniad Cymru Greadigol yn 2008, Menna Elfyn, yn datgelu enw enillydd cystadleuaeth newydd 'Troi a Throsi' Tŷ Cyfieithu Cymru.

Bydd y bardd perfformio a Bardd Plant 2008-09, Ifor ap Glyn a Gwyneth Glyn, Bardd Plant 2006-07, yn cwrdd ac yn gweithio gydag aelodau Sgwadiau Sgwennu'r Ifainc yr Academi.

Bydd cyfle hefyd i brynu amrywiaeth eang o lyfrau gwych o'r gyfres boblogaidd Library of Wales sy'n cynnwys y clasuron, y gwaith diweddaraf i blant a gweithiau gan awduron cyfoes Cymru. Ac ar 25 Mai, caiff rhestr fer Llyfr y Flwyddyn 2009 ei chyhoeddi.

Menter ar y cyd yw stondin Llenyddiaeth yng Nghymru rhwng Llywodraeth y Cynulliad, Cyngor Celfyddydau Cymru, Academi, Llyfrgell Genedlaethol Cymru, Celfyddydau Rhyngwladol Cymru a Chyngor Llyfrau Cymru. Nod y bartneriaeth yw hyrwyddo llenyddiaeth a llenorion Cymru i gynulleidfaoedd yng ngwledydd eraill Prydain a ledled y byd.

Mae'r Gweinidog Treftadaeth, Alun Ffred Jones Ac, yn falch o gael cefnogi stondin Llenyddiaeth yng Nghymru:

"Mae llygaid llên y byd yn troi i gyfeiriad Cymru yn ystod Gŵyl y Gelli. Mae'n gyfle gwych felly i ddangos iddyn nhw yr hyn sydd gennym i'w gynnig. Mae'r digwyddiadau fydd yn cael eu cynnal ar stondin Llenyddiaeth yng Nghymru yn dangos amrywiaeth a chyfoeth y talentau sydd gan Gymru i'w cynnig. Rwy'n hyderus y bydd yr ŵyl yn ysbrydoli llengarwyr o Gymru a thu hwnt unwaith eto eleni."

Meddai Prif Swyddog Gweithredol yr Academi, Peter Finch:

"Mae sgwennu yng Nghymru wedi dod i oed. Mae gan ein llenorion y doniau i wefreiddio. Dewch i gwrdd â nhw i yn y Gelli. Dyma gyfle heb ei ail."

Ychwanegodd Dai Smith, Cadeirydd Cyngor Celfyddydau Cymru:

"Mae'n wych cael gweithio gyda'n gilydd unwaith eto i gynnal amrywiaeth eang o ddigwyddiadau cyffrous ar stondin Llenyddiaeth yng Nghymru yng Ngŵyl y Gelli eleni. Mae'r ŵyl yn llwyfan ardderchog ryngwladol o lenyddiaeth o safon byd. A bydd Cymru, gyda'i thorreth o dalentau, yn disgleirio unwaith eto arni".

/Diwedd

Am fwy o wybodaeth am raglen Llenyddiaeth yng Nghymru, cliciwch ar y ddolen, 'Gelli 2009' isod.

Am raglen lawn o holl weithgareddau'r Gelli ewch ar: www.hayfestival.com/

Am wybodaeth y Wasg a'r Cyfryngau am stondin Llenyddiaeth yng Nghymru, cysylltwch â
Bob Mole, Rhaglennydd Stondin Llenyddiaeth yng Nghymru -02920472266. bob@academi.org

Academi: www.academi.org/
Cyngor Celfyddydau Cymru: www.celfcymru.org/
Llyfrgell Genedlaethol Cymru: www.llgc.org.uk/
Cyngor Llyfrau Cymru: www.wbc.org.uk
Celfyddydau Rhyngwladol Cymru: www.wai.org.uk/